შეშის დეფიციტი ქუთაისში და მოსახლეობის გაზრდილი მოთხოვნა-ვინ გათბება ზამთარში?

ქუთაისის მერიაში შეშით უზრუნველყოფის თხოვნით 500 განცხადებაა შესული. ადგილობრივი ხელისუფლებისგან სათბობი მასალის გადაცემას როგორც კერძო სექტორში, ისე საერთო საცხოვრებლებში მყოფი მოქალაქეები ითხოვენ. შეშის მთხოვნელთა სიაში არიან სოციალურად დაუცველი, სოციალურად დაუცველის სტატუსის არმქონე, თუმცა მძიმე ეკონომიკურ პირობებში მყოფი ოჯახები და იძულებით გადაადგილებული პირები.
მოქალაქეები განმარტავენ, რომ მათთვის ზამთრის პერიოდში გათბობისა და საკვების მომზადების ერთადერთი საშუალება ღუმელია.
ქალაქის მერიის კეთილმოწყობის სამსახურმა ამ დროისათვის შეშით 70 ოჯახის დაკმაყოფილება შეძლო. სამსახურის უფროსი მალხაზ ბასილაძე ამბობს, რომ მერიას შეშა მცირე რაოდენობით აქვს. ამიტომ, შეშის გადაცემისას უპირატესობა სოციალურად დაუცველ მოქალაქეებს მიენიჭებათ.
„გასულ წელს შეშა 180 ოჯახს მივეცით. წელს ამდენის საშუალება არ გვაქვს. მოგეხსენებათ ქალაქს თავისი ტყე არ აქვს. ხეების გადაბელვის შედეგად რა ნარჩენებიც მივიღეთ, 70 ოჯახს დავურიგეთ. კიდევ შეიძლება 30 ოჯახისათვის გადასაცემი შეშა მოვიძიოთ. თითოეული ოჯახის მდგომარეობას ვიზიარებთ. განცხადებების დიდი რაოდენობიდან გამომდინარე, მერიის სოციალურ სამსახურთან ერთად განვსაზღვრეთ ის ოჯახები, რომლებიც შეშას მიიღებენ,“ - ამბობს მალხაზ ბასილაძე.