"ვიწვევ თავს საინტერესო ცვლილებებისთვის,"- გუბერნატორის აპარატის უფროსის მოადგილე თანამდებობას ტოვებს

იმერეთის გუბერნატორის აპარატის უფროსის მოადგილე ზეკო ხაჩიძე აღნიშნულ თანამდებობაზე გამოცხადებულ კონკურსში მონაწილეობას არ აპირებს და თანამდებობას ტოვებს.
იმერეთის სამხარეო ადმინისტრაციაში ზეკო ხაჩიძის მოვალეობას საზოგადოებასთან ურთიერთობა წარმოადგენს. ხაჩიძე იმერეთის გუბერნიაში თემურ შაშიაშვილის გუბერნატორობის დროს მოვიდა.
იმერეთის გუბერნატორის აპარატის უფროსის მოადგილის ვაკანტური თანამდებობის დაკავების სურვილს ამ დროისათვის 22 ადამიანი გამოთქვამს. ამდენივე განაცხადია ატვირთული საჯარო სამსახურის ბიუროს ვებ-გვერდზე -Hr.gov.ge-ზე.
ზეკო ხაჩიძე თანამდებობის დატოვებასთან დაკავშირებით მიღებულ გადაწყვეტილებას ამგვარად ხსნის:
„მივიღე გადაწყვეტილება დავასრულო გუბერნიაში ჩემი მოღვაწეობა და გავაგრძელო ჩემი გუბერნიის გულშემატკივრობა. არ ვიცი სად წავალ, მაგრამ მინდა რაიმე ღირებული ნამდვილად გავაკეთო. ვიწვევ საკუთარ თავს საინტერესო ცვლილებებისთვის,“ - ამბობს ზეკო ხაჩიძე.