„კონკურსის და ატესტაციის ყველა ეტაპი მაქსიმალურად გამჭვირვალე იქნება“

ქუთაისის მერიასა და საკრებულოში ატესტაციის შედეგად დარჩენილ ვაკანტურ თანამდებობებზე ახალი კონკურსი გამოცხადდა. 48 ვაკანტურ პოზიციაზე კონკურსში მონაწილეობის მსურველებმა განაცხადები 4 დეკემბრის ჩათვლით უნდა გააკეთონ.
კონკურსში მონაწილეობის მსურველმა კანდიდატმა საკონკურსო კომისიას უნდა წარუდგინოს:
ა/ განაცხადი მხოლოდ ელექტრონული ფორმით საჯარო სამსახურის ბიუროს მიერ ადმინისტრირებული ვებგვერდის /www.hr.gov.ge/ მეშვეობით /კანდიდატს უფლება აქვს გამოცხადებულ კონკურსში მონაწილეობის თაობაზე განაცხადი წარადგინოს არაუმეტეს, ხუთ ვაკანსიაზე. ხუთზე მეტ ვაკანსიაზე განაცხადის წარდგენის შემთხვევაში კანდიდატი მოიხსნება კონკურსიდან/.
ბ/ განათლების ან შესაბამისი კვალიფიკაციის მოწმობა /დიპლომის ასლი/;
გ/ პირადობის დამადასტურებელი დოკუმენტის ასლი;
დ/ სტაჟის დამადასტურებელი სათანადოდ გაფორმებული დოკუმენტის /შრომის წიგნაკი – არსებობის შემთხვევაში ან უფლებამოსილი ორგანოს მიერ გაცემული ცნობა/ ასლი; აღნიშნული ვრცელდება იმ ვაკანსიებზე, სადაც სტაჟი მოითხოვება.
კონკურსი სამ ეტაპს: საბუთების გადარჩევას, ტესტირებას და გასაუბრებას მოიცავს. ტესტი 60 შეკითხვისგან შედგება. მესამე ეტაპზე გადასასვლელად კანდიდატმა კითხვების 70%-ს უნდა უპასუხოს.
"კონკურსის და ატესტაციის ყველა ეტაპი მაქსიმალურად გამჭვირვალე იქნება. ვიმედოვნებ, რომ მოქალაქეები, რომლებმაც პირველ ეტაპზე დაუშვეს შეცდომები, იგივე შეცდომებს არ დაუშვებენ," - ამბობს შოთა მურღულია.