ქუთაისის მერიას გადათხრილი გზების შეკეთებისკენ მოუწოდებენ

„თავისუფალი საქართველოს“ იმერეთის ორგანიზაციის წარმომადგენლობამ ქუთაისის მერიის წინ ბრიფინგი გამართა.
პარტიის რეგიონული ორგანიზაციის ხელმძღვანელის გოგი წულაიას თქმით, ქალაქში სხვადასხვა კომპანიის მიერ დაწყებული სამუშაოები დაუსრულებელია, რის გამოც პასუხისმგებლობა ქუთაისის მერიას ეკისრება.
„ ქალაქში სხვადასხვა ადგილას გადათხრილია ქუჩები და ტროტუარები. წყალმომარაგების კომპანია, ახალი ქსელები, გაზის კომპანია დაწყებულ სამუშაოებს არ ასრულებენ. რის გამოც, როგორც მძღოლებს, ისე მოქალაქეებს პრობლემები ექმნებათ. მოვუწოდებ ქუთაისის მერიას კეთილი ინებოს და კომპანიებს დაავალდებულოს სამუშაოების დასრულება,“- აცხადებს გოგი წულაია.
წულაიას ქუთაისის მერიის კეთილმოწყობის სამსახურის უფროსი მალხაზ ბასილაძე გამოეხმაურა. მისი თქმით, აღნიშნულ სამუშაოებზე კონტროლს მერიის ზედამხედველობის სამსახური ახორციელებს.