"ჩემი შვილი დაიჭირეს და დღისით, მზისით იარაღი ჩაუდეს"

ბაღდათის რაიონულ პოლიციასთან 20 წლის ირაკლი აბულაძის მეგობრები და ოჯახის წევრები საპროტესტო აქციას მართავენ.
მათი განცხადებით, ირაკლი აბულაძე შუადღეზე სამართალდაცავებმა ბაღდათის ცენტრში ძალის გამოყენებით დააკავეს და იარაღი ჩაუდეს. აბულაძის ახლობლები ეჭვობენ, ახალგაზრდა ნაცემია, რადგან როგორც ისინი ამბობენ, ადვოკატს მისი ნახვის საშუალებას არ აძლევენ.
"სამ საათზე მეტია ადვოკატს შენობაში შესვლა უნდა და ვერ ახერხებს. მგონია, რომ ჩემი შვილი ნაცემია. მთელმა ბაღდათმა დაინახა და ყვებიან, დღისით, მზისით როგორ ჩაუდეს იარაღი. აქ ბაღდათში რამდენიმე ყაჩაღობა მოხდა. ეს საქმეები გაუხსნელია და ალბათ უნდათ, რომ ერთ-ერთი მათგანი ჩემს შვილს დააბრალონ," - ამბობს აბულაძის დედა ნათია აბულაძე.
შინაგან საქმეთა სამინისტროს პრესსამსახურში აცხადებენ, რომ ირაკლი აბულაძე ცეცხლსასროლი იარაღის უკანონო შეძენა-შენახვისა და პოლიციისათვის წინააღმდეგობის გაწევის მუხლით არის დაკავებული.