ტრანსპორტის სამსახური: მძღოლებმა ყოველგვარ ზღვარს გადააბიჯეს

ქუთაისის მერიამ ქალაქში გამოსაცდელ რეჟიმში დანიშნული #57 საქალაქო მარშუტი გააუქმა. აღნიშნული ხაზის დამატებამ თაბუკაშვილის ქუჩის მიმართულებით მოძრავი და #1 საქალაქო ავტობუსების მძღოლების გაღიზიანება გამოიწვია. პროტესტის ნიშნად კი მძღოლებმა ტრანსპორტი მერიის შენობის წინ ჩააყენეს.
ქალაქის მერიის ტრანსპორტის სამსახურის მთავარი სპეციალისტის დათო კბილაშვილის თქმით, მერიის მიერ მძღოლების მოთხოვნის შესრულების შემდეგ, მათ კიდევ ახალი მოთხოვნა წამოაყენეს. კბილაშვილის თქმით, საქალაქო ტრანსპორტის მძღოლები ამჯერად #26 მარშუტის გაუქმებას ითხოვენ, რომელიც ჭავჭავაძის გამზირიდან გორა-საქუსლიას მიმართულებით მოძრაობს.
„მძღოლები ვერ არიან დალაგებული. როგორ უნდა გავაუქმოთ 26 ნომერი, როდესაც ნებართვაა გაცემული. თურმე ორი მიკროავტობუსი უშლით ხელს. ასე არ შეიძლება. ბავშვებივით იქცევიან. ერთი მოთხოვნა გაუვიდათ და მეორეს აყენებენ. ყოველგვარ ზღვარს გადააბიჯეს. ჩვენ მაგათ ბიზნეს ინტერესებს და მოსახლეობის მოთხოვნებს ვერ დავამთხვევთ,“ - ამბობს კბილაშვილი.