სოფელ გლოლაში სტიქიამ საცხოვრებელი სახლი დააზიანა

ონის მუნიციპალიტეტის სოფელი გლოლა სტიქიამ დააზარალა.

ძლიერი წვიმის შედეგად სოფელში მდინარეები-ბოყოსწყალი, ილინე და ბუბაურა მოდიდდა, რამაც აღნიშნულ სოფელში გარკვეული პრობლემები შექმნა:

მდ. ბოყოსწყალმა დააზიანა სოფელ გლოლაში, გაღმა უბნის წყალსადენი სისტემა;

დაზიანდა საცხოვრებელი სახლი და მისი საკარმიდამო-ნაკვეთი;

მდ. ილინემ სრულად გაანადგურა სოფელ გლოლის, გორიბოლოს უბანში არსებული წყლის სისტემა და საფრთხე შეუქმნა საგლოლოზე არსებულ საავტომობილო ხიდს.

“დღეს დილიდან სტიქიის ზონაში იმყოფებოდნენ რაჭა-ლეჩხუმისა და ქვემო სვანეთის მხარის რწმუნებული პაპუნა მარგველიძე, პირველ მოადგილე ქრისტინა კობახიძესთან, რაჭა-ლეჩხუმ სვანეთის მაჟორიტარი დეპუტატის ბიუროს ხელმძღვანელთან, გიორგი მახათაძესთან და ადგილობრივი ხელისუფლების სხვა წარმომადგენლებთან ერთად.

ამ ეტაპისთვის მიმდინარეობს ზარალის დათვლა და უახლოეს დღეებში დაიწყება წყალსადენი სისტემების სარეაბილიტაციო სამუშაოები,”-ნათქვამია გავრცელებულ ინფორმაციაში.