ქუთაისში, სასწრაფო დახმარების სამსახურის თანამშრომლები მენეჯერის გათავისუფლებას აპროტესტებენ

სასწრაფო დახმარების სამსახურის ქუთაისის ფილიალის თანამშრომლები ქალაქის მერიასთან აქციას მართავენ. ისინი ფილიალის მენეჯერის მაია რუხაძის სამსახურიდან გათავისუფლებას აპროტესტებენ.

აქციის მონაწილეები აცხადებენ, რომ მათთვის მენეჯერის განთავისუფლების მიზეზები უცნობია. ისინი ხელმძღვანელობისგან მიზეზების განმარტებას ითხოვენ.

“აქ ვართ ჩვენი მანქანებით და აქედან გავდივართ გამოძახებებზე. არც მაიამ იცის გათავისუფლების მიზეზები. ველოდებით განმარტებებს,”-აცხადებენ სასწრაფო დახმარების სამსახურის თანამშრომლები.

აქციას გამოეხმაურა საგანგებო სიტუაციების კოორდინაციისა და გადაუდებელი დახმარების ცენტრის დირექტორის მოადგილე. დავით ტორუას თქმით, ქუთაისის სამსახურის მენეჯერმა მაია რუხაძემ თანამდებობა პირადი განცხადების საფუძველზე დატოვა.

დავით ტორუას თქმით, ის ესაუბრა სასწრაფოს თანამშრომლებს. მისივე თქმით, სამსახური ამ ეტაპზე შეუფერხებლად განაგრძობს მუშაობას.