„ოცნების“ ქუთაისის ორგანიზაციის თავმჯდომარე საარჩევნო სიაში არ ჩასვეს

კოალიცია „ქართული ოცნების“ ქუთაისის შტაბის უფროსი მანანა მიქაძე საარჩევნო პროპორციულ სიაში არ ჩასვეს. Topnews-ის ინფორმაციით, მიქაძის დაბლოკვა გუბერნატორის მიერ მოხდა, რომელმაც კოალიციის ცენტრალურ ოფისში საკუთარი სიები გადაგზავნა, რომელშიც მანანა მიქაძე არ ფიგურირებს.
მომხდარზე საუბარი არ სურს თავად მიქაძეს. მან კომენტარის გაკეთებაზე უარი განაცხადა.
„არ ვაკეთებ ამ საკითხზე კომენტარს. მიმართეთ შტაბის უფროსს“,-ამბობს მიქაძე.
სატელეფონო კომენტარზე უარს ამბობს შოთა მურღულიას საარჩევნო შტაბის უფროსი კოტე ლომიძეც. მისი თქმით, იგი განმარტებებს მოგვიანებით გააკეთებს.
კოალიციის მიერ დაწუნებული მანანა მიქაძე „ქართული ოცნების“ რეგიონული ორგანიზაციის თავმჯდომარედ 2013 წლის 21 იანვარს აირჩიეს. იგი პოლიტიკაში უნივერისტეტიდან მოვიდა, რასაც, წინ ხმაურიანი პორცესები უძღოდა. მანანა მიქაძე წლების განმავლობაში აკაკი წერეთლის სახელმწიფო ინივერისტეტის პროფესორი იყო და როგორც თავად აცხადებდა, იგი სასწავლო დაწესებულებიდან განსხვავებული პოლიტიკური შეხედულებების გამო გაათავისუფლეს.