ქუთაისში იმ კლინიკების რაოდენობა იზრდება, რომლებიც კოვიდინფიცირებულებს მიიღებენ

ბოლო 24 საათის განმავლობაში იმერეთის რეგიონში კორონავირუსის 16 ახალი შემთხვევა გამოვლინდა. აქედან 15 შემთხვევა ქუთაისის 32-ე საჯარო სკოლის კლასტერს უკავშირდება, ხოლო ერთი შემთხვევის ინფიცირების წყარო უცნობია.

გასული დღე-ღამის განმავლობაში დაავადებათა კონტროლის ეროვნული ცენტრის იმერეთის სამმართველოს ლაბორატორიამ ჯამში 1100-მდე ბიოლოგიური მასალა გამოიკვლია.

კორონავირუსით ინფიცირებულთა რაოდენობის ზრდის პარალელურად, იმერეთში იზრდება იმ კლინიკების ჩამონათვალი, რომლებიც კოვიდინფიცირებულებს მიიღებენ.

კოვიდინფიცირებულთა მკურნალობაში სრულად ჩაერთვება “ლჯ და კომპანია” და რეფერალური ჰოსპიტალი. ინფიცირებულებს მიიღებს “კლინიკა ბომონდი”. აღნიშნულ კლინიკაში კოვიდინფიცირებულთა სამკურნალოდ ერთი კორპუსი გამოიყოფა.