შოთა მურღულია: ქუთაისის ცენტრალური შემოსასვლელი ნიკეას ქუჩიდან იქნება

„ქუთაისის ცენტრალური შემოსასვლელი გახდება ნიკეას ტერიტორია“,აღნიშნულის შესახებ ქალაქის მერის მოვალეობის შემსრულებელმა შოთა მურღულიამ ქუთაისში მოქმედ არქიტექტორებთან საუბრისას განაცხადა.
მურღულიას თქმით, თბილისი-ზესტაფონი-სამტრედიიის მაგისტრალის მშენებლობის დასრულების შემდეგ ნიკეას ტერიტორია ქალაქის მთავარი შემოსასვლელი გახდება.

„2012 წელს ჩვენ დავიწყეთ მუშაობა ქალაქის განვითარების გეგმაზე. უნდა შევქმნათ მუშა ჯგუფი, რომელიც იზრუნებს ქალაქის განვითარების პრიორიტეტებზე. რაც შეეხება ნიკეას უბანს, მოგეხსენებათ, რომ მიმდინარეობს მაგისტრალის მშენებლობა, რომლის დასრულების შემდეგაც ქალაქის ცენტრალური შემოსასვლელი ნიკეას ტერიტორია გახდება,"- განმარტა შეხვედრაზე მურღულიამ.
მისი თქმით, აღნიშნულ უბანში ინფრასტრუქტურისა და შენობა-ნაგებობების მოწყობა ისე უნდა მოხდეს, როგორც ქალაქის მთავარ შემოსასვლელს შეესაბამება.
2015-2017 წლების ქალაქის განვითარების სტრატეგიული გეგმის ფარგლებში არქიტექტორების გარდა, სამუშაო შეხვედრა არასამთავრობო სექტორთანაც შედგა.