მაია ცქიტიშვილი: ქუთაისს პარლამენტის არქონით ხელისუფლების მხრიდან ყურადღება არ დაკლებია

ინფრასტრუქტურის მინისტრის მაია ცქიტიშვილის განცხადებით, ხელისუფლება ქუთაისში მდებარე პარლამენტის ყოფილი შენობის პრივატიზებას და მისთვის სხვა ფუნქციის გამოძებნას გეგმავს.

“როგორც მოგეხსენებათ, პარალამენტის შენობა არის ამ ეტაპზე ეკონომიკის სამინისტროს ბალანსზე. არის დაგეგმილი ამ შენობების პრივატიზება და შესაბამისად ამ შენობებისთვის სხვა ფუნქციის გამოძებნა. სამწუხაროდ, პარლამენტის შენობის ქუთაისში აშენებით თავის დროზე მოხდა არასწორი გადაწყვეტილების მიღება. თქვენ კარგად იცით, რომ ძალიან ბევრი პრობლემა იყო უშუალოდ ამ შენობაში და ეს შენობა საჭიროებს ძალიან ბევრ ინვესტიციას იმისთვის, რომ შენობის გადაკეთება მოხდეს და მოწესრიგდეს სავენტილაციო სისტემა.

პარალამენტის შენობის ქუთაისში აშენებაში 300 მილიონი ლარის ინვესტიცია მოხდა მაშინ, როდესაც ქუთაისს არ ჰქონდა წყალმომარაგების სისტემა და მხოლოდ წელს ჩვენ შევძელით 24 საათიანი წყალმომარაგების მოგვარება.

ძალიან პრობლემა ჰქონდათ იმ ადამიანებს, ვინც აქ მუშაობდა-აპარატის თანამშრომლებს, მათი ოჯახის წევრებს და ა.შ. ამ შემთხვევაში პარლამენტი მუშაობს იქ, სადაც პარლამენტი თავდაპირველად მუშაობდა.

ქუთაისს და მის განვითარებას რაც შეეხება, აქ არაერთი მნიშვნელოვანი საკითხი მოწესრიგდა-განვითარდა ტურიზმი, განვითარდა ბიზნესი საწარმოები, და სწორედ ტურისტული მოზიდულობის ცენტრის შექმნით ქუთაისს აქვს საშუალება ახალი სამუშაო ადგილი იყოს შექმნილი.

ქუთაისს პარლამენტის არქონით ხელისუფლების მხრიდან ყურადღება არ დაკლებია. პირიქით ქუთაისში გაკეთდა ისეთი საქმეები, რაც მხოლოდ სწორედ პარლამენტის მშენებლობით ვერ იქნებოდა მოგვარებული,”-ამბობს მაია ცქიტიშვილი.