ქუთაისში მყოფმა რუსმა ტურისტებმა პუტინის წინააღმდეგ აქცია დაგეგმეს

ქუთაისში მყოფი რუსი ტურისტები, 13:00 საათზე, რუსეთის პრეზიდენტის ვლადიმერ პუტინის წინააღმდეგ საპროტესტო აქციას გამართავენ.
აქციის ორგანიზატორის თქმით, ის შეშფოთებულია ვლადიმერ პუტინის იმ გადაწყვეტილებით, რომლის საფუძველზე ყირიმში რუსი სამხედროები გამოჩნდნენ.

„პუტინო, დაანებე ჩვენს მეგობარ უკრაინელ ერს თავი. მე, როგორც რუსეთის სახელმწიფოს წარმომადგენელი, გამოვხატავ ჩემს აზრს და მოვუწოდებ პუტინს, რომ შეწყვიტოს უკრაინელი ხალხის დევნა. უკრაინა არის ჩვენი მეზობელი და მეგობარი ქვეყანა ამიტომ, გადავწყვიტეთ, რომ დღეს, 13:00 საათზე, ჩაის სახლ „ფოე-ფოეს“ წინ გავმართოთ აქცია პლაკატებით ხელში“, - აცხადებს აქციის ორგანიზატორი, რომელიც ვინაობას მხოლოდ იმიტომ არ ასახელებს, რომ მისი თქმით, რუსეთში დაბრუნების დროს საზღვარზე პრობლემები შეექმნება.