ქუთაისის მერი: ქუთაისში სასკოლო განათლება მაღალ დონეზეა

ქუთაისის მოსწავლე-ახალგაზრდობის სასახლეში მოსწავლეთა 68-ე სასწავლო შემოქმედებითი კონფერენცია მიმდინარეობს. კონფერენციაში დაახლოებით 300-მდე მოსწავლე იღებს მონაწილეობას. ქუთაისში შერჩეული ნამუშევრები თბილისში, ეროვნულ კონფერენციაზე გაიგზავნება. მოსწავლე-ახალგაზრდობის სასახლეში მიმდინარე პროცესს დღეს ქალაქის მერის მოვალეობის შემსრულებელი შოთა მურღულია და კულტურულ დაწესებულებათა გაერთიანების ხელმძღვანელი ლადო პატარიძე გაეცნენ.
„ქუთაისის მოსწავლე ახალგაზრდობის სასახლეში დაახლოებით 20 სექციაში მიდის მოსწავლეთა ნაშრომების შემოწმება. ქუთაისში სასკოლო განათლება მაღალ დონეზეა, რაც ეროვნულ გამოცდებსა და ამ კონფერენციებზე ჩანს. მომავალი თაობა ამ ქალაქის გადარჩენის წინაპირობაა,“ - ამბობს მურღულია.
მერმა დღესვე მოსწავლე-ახალგაზრდობის სასახლის ერთ ნაწილში მიმდინარე სარეაბილიტაციო სამუშაოები დაათვალიერა. სამსართულიანი შენობის მოწყობა, სადაც ვასაძის სასწავლებელი დაიდებს ბინას, ქალაქის ბიუჯეტს 40 000 ლარი უჯდება.