'მოგვეშველეთ, ანტისანიტარიაში ვიხრჩობით,'-ქუთაისში, წერეთლის ქუჩაზე მაცხოვრებლები დახმარებას ითხოვენ

ქუთაისში, წერეთლის ქუჩაზე მცხოვრები მოსახლეობა დახმარებას ითხოვს.

აღნიშნულ ქუჩაზე მცხოვრებლების თქმით, გზის საფარი მწყობრიდან არის გამოსული, რის გამოც ადგილობრივებს გადაადგილება უჭირთ.

ასევე, მოსახლეობის განმარტებით, ქუჩაზე საკანალიზაციო ქსელი არ არსებობს, რის გამოც ფეკალური მასები მდინარე რიონში ჩაედინება.

"აქ ცხოვრება შეუძლებელია. გზა ავარიულია, სასწრაფოსაც კი უჭირს ჩვენს ქუჩაზე მოსვლა. კანალიზაცია პირდაპირ რიონში ჩაედინება, გზებზე კი ნაგავი ყრია, ქუთაისის მერმა საერთოდ იცის ამ ქუჩის პრობლემების შესახებ?! მოგვეშველეთ, ანტისანიტარიაში ვიხრჩობით,"- განაცხადა ადგილობრივმა ვეფხო მიქაუტაძემ.

ქუთაისის მერიაში აღნიშნულ საკითხზე ჯერჯერობით კომენტარს არ აკეთებენ.