„პატიმარი იყო სულიერად აღელვებული"-სპეციალური პენიტენციური სამსახური განცხადებას ავრცელებს

ქუთაისის, სასჯელაღსრულების მეორე დაწესებულებაში გარდაცვლილი 25 წლის პატიმარის სუიციდის შემთხვევასთან დაკავშირებით, სპეციალური პენიტენციური სამსახური განცხადებას ავრცელებს.

უწყების ინფორმაციით, მსჯავრდებულმა მას შემდეგ, რაც დედის გარდაცვალება გაიგო, აღელვებული იყო.

"მიმდინარე წლის 15 ნოემბერს, დაახლოებით 03.30 საათზე, N2 პენიტენციურ დაწესებულებაში 1993 წელს დაბადებულმა მსჯავრდებულმა ემილ ხოფერიამ საკნის საპირფარეშოში თვითნაკეთი თოკის გამოყენებით თავი მოიკლა. აღსანიშნავია, რომ თვითმკვლელობამდე ერთი დღით ადრე მსჯავრდებულს სატელეფონო საუბარი ჰქონდა ოჯახის წევრებთან, რა დროსაც მას დედის გარდაცვალების შესახებ აცნობეს. მსჯავრდებული სატელეფონო ზარის შემდეგ იყო სულიერად აღელვებული, რის გამოც მას გაეწია სამედიცინო დახმარება და ფსიქოლოგის კონსულტაცია.თვითმკვლელობის ფაქტთან დაკავშირებით იმავე ღამეს დაიწყო გამოძიება, რომლის ფარგლებშიც გარდაცვლილის გვამს ექსპერტიზა ჩაუტარდა, დაკითხულია დაწესებულების ექიმი, თანამშრომლების ერთი ნაწილი და გარდაცვლილის თანამესაკნეები. გრძელდება დაწესებულების თანამშრომელთა დაკითხვა.ემილ ხოფერია 2015 წლიდან იხდიდა სასჯელს,"- აცხადებენ სპეციალური პენიტენციურ სამსახურში.