'თუ ჩვენ მოთხოვნას არ გაითვალისწინებს, ჭიღვარიასაც ძველი მერის გზას გავუყენებთ,'- ქუთაისის მერს ქალაქის საბჭოთა სიმბოლიკისგან გათავისუფლებას სთხოვენ

ქუთაისში, საბჭოთა დასახელების ქუჩებისათვის სახელების გადარქმევისა და კიკვიძის ძეგლის აღების მოთხოვნით, არასამთავრობო ორგანიზაცია „ევროპა ჩვენი სახლია“ ქუთაისის ახალ ხელისუფლებას მიმართავს. ორგანიზაციის წევრებმა ქუთაისის დემოკრატიული ჩართულობის ცენტრში დღეს ბრიფინგი საზოგადოების წარმომადგენლებთან ერთად გამართეს.

მხატვარი ირაკლი ჩოგოვაძე თვლის, რომ მათი მოთხოვნის შესრულება გაძლიერებული რუსული პროპაგანდის ფონზე, საქართველოს მხრიდან ევროატლანტიკური კურსის დაფიქსირების კარგი მაგალითი იქნება.

„შოთა მურღულიას მერობის დროს „ევროპა ჩვენი სახლია“-მ არაერთხელ მიმართა მერიას კიკვიძის ძეგლის აღებისა და რუსული დასახელების ქუჩებისათვის სახელების გადარქმევის მოთხოვნით, თუმცა სხვადასხვა მიზეზი ჰქონდათ. ერთ-ერთ მიზეზად უსახსრობას ასახეელბდნენ. ამჟამად მერიის ახალ ადმინისტრაციას მივმართავთ და თუ მათი მხრიდანაც უარი იქნება, ჭიღვარიაასაც ძველი მერის გზას გავუყენებთ,“ - ამბობს ირაკლი ჩოგოვაძე.

ქუთაისის მერიის პრესსამსახურში აცხადებენ, რომ არასამთავრობო ორგანიზაციის მოთხოვნასთან დაკავშირებით კომენტარს მოგვიანებით გააკეთებენ.