ქუთაისის 'ტორპედო' აუქციონზე 585 000 ლარად იყიდება

ქუთაისის მერიამ ქალაქის საფეხბურთო კლუბის -„ტორპედო“-ს გასასხვისებლად აუქციონი გამოაცხადა. აუქციონის გამოცხადებამდე კლუბის შეფასება ადგილობრივმა ხელისუფლებამ სამხარაულის სახელობის ექსპერტიზის ბიუროს სთხოვა. ექპერტიზის დასკვნის მიხედვით, „ტორპედო“-ს ღირებულება 585 000 ლარს შეადგენს.

ქალაქის მერიაში იმედოვნებენ, რომ აუქციონის შედეგად კლუბი კერძო საკუთრებაში აღმოჩნდება. მერიის ეკონომიკური სამსახურის ხელმძღვანელი პაატა კლდიაშვილი ამბობს, რომ კლუბის მეპატრონის მიუხედაად, ქუთაისის ხელისუფლება „ტორპედო“-ს დახმარებას გააგრძელებს.

„ჩვენს მიერ აღნიშნული კლუბის გასხვისების მიზნით, გუშინ გამოცხადდა აუქციონი. იმედი გვაქვს, რომ აუქციონის შედეგად „ტორპედო“ მოხვდება კერძო საკუთრებაში, თუმცა იმის მიუხედავად ვის ხელში იქნება „ტორპედო“, ქალაქის ხელისუფლება შესაძლებლობების ფარგლებში ყველაფერს გააკეთებს იმისთვის, რომ კლუბი წარმატებული იყოს,“ - აცხადებს პაატა კლდიაშვილი.