'თავისუფალმა საქართველომ' ქუთაისის მერიისა და 'მაკდონალდსის' წინააღმდეგ პროკურატურას მიმართა

"თავისუფალი საქართველოს" იმერეთის ორგანიზაციის ხელმძღვანელი გოგი წულაია პროკურატურას მიმართავს.

წულაიას განცხადებით, პროკურატურამ ქუთაისის მერიასა და "მაკდონალდს" შორის კორუფციული გარიგების ფაქტი უნდა გამოიკვლიოს. კერძოდ, ოპოზიციური პარტიის წარმომადგენლის თქმით, იმ ფონზე, როდესაც "მაკდონალდს" ჭავჭავაძის გამზირზე სწრაფი კვების ობიექტის აშენებისთვის ნაკისრი ვალდებულებები შესრულებული არ აქვს, მერიამ მას ქალაქის ცენტრალურ მოედანზე მეორე ობიექტის მშენებლობის უფლება მისცა.

"კოკა-კოლამ ერთი სიმახინჯე ხომ აგვიშენა ჭავჭავაძის გამზირზე და ახლა კორუფციული გარიგებით მეორე სიმახინჯეს გვიშენებს. "მაკდონალდს" ქალაქის წინაშე ჯერ კიდევ 2007 წელს ნაკისრი ვალდებულებები არ შეუსრულებია. ჩვენ უნდა ვიცოდეთ, განახორციელა თუ არა ხელშეკრულებით ნაკისრი ინვესტირება," - აცხადებს წულაია.

ქუთაისის მერიაში წულაიას საპასუხოდ ამბობენ, რომ "ვალდებულებაც შესრულებულია და შესაბამისი დოკუმენტაციაც გაეგზავნა გოგი წულაიას. თუ არ სჯერა პასუხის, კარგია, რომ მიმართა პროკურატურას".