'მივმართავ ქუთაისის მაჟორიტარებს და ქალაქის საკრებულოს უმრავლესობის ყველა წევრს'

მსოფლიო ჩემპიონი და წიგნის- "არჩევნების ანატომიის" ავტორი ბესო მიქელთაძე დეპუტატებს მიმართავს. მიქელთაძე მათ პარლამენტის ადგილმდებარეობის საკითხთან დაკავშირებით თავიანთი პოზიციის დაფიქსირებისაკენ მოუწოდებს.

"როგორც რიგითი ქუთაისელი, ღია წერილით მივმართავ საქართველოს პარლამენტის წევრებს, ქუთაისის მაჟორიტარ დეპუტატებს: ბატონებს- კობა ნარჩემაშვილს, დიმიტრი მხეიძეს, გენადი მარგველაშვილს, ასევე ქუთაისის საკრებულოს უმრავლესობის უკლებლივ ყველა დეპუტატს. ბატონებო! უმორჩილესად გთხოვთ, უკლებლივ ყველამ საჯაროდ დააფიქსიროთ საკუთარი აზრი, თარხან მოურავის "პატრიოტთა ალიანსის" ავანტიურისტი დეპუტატის ქალბატონ ადა მარშანიას სამარცხვინო განცხადებაზე, ქუთაისზე როგორც ქალაქზე, მისთვის დედაქალაქის ფუნქციის შესაძლო ჩამორთმევასთან დაკავშირებით. იმედს ვიტოვებ თქვენი საჯარო პოზიცია ჩვენი ქალაქის სიყვარულია," - ამბობს მიქელთაძე.

როგორც მარშანიამ აღნიშნა, პარლამენტის ქუთაისიდან თბილისში გადმოტანის წინააღმდეგი არავინაა და ეს მოხდება მაშინ, როდესაც პარლამენტი კონსტიტუციაში ცვლილებებს მიიღებს.

”ცხადია, შევთანხმდით იმაზე, რომ პარლამენტი თბილისში იმუშავებს და გადმოვა აქ. ეს მოხდება მაშინ, როცა მივიღებთ კონსტიტუციას. თავად პროექტში, რომელსაც დღეს ვიხილავთ ასეთი ჩანაწერი არის და პარლამენტის თბილისში გადმოტანის წინააღმდეგი არავინ იყო”, - განაცხადა ადა მარშანიამ.