ქუთაისის კინოთეატრში რეზო ჩხეიძის სახელობის დარბაზი გაიხსნა

ქუთაისში, ყოფილი კინო „საქართველო“-ს შენობაში კინორეჟისორ რეზო ჩხეიძის სახელობის დარბაზი გაიხსნა. როგორც შემოქმედებითი ჯგუფის „ჯარისკაცის მამის“ დამფუძნებელმა ინეზა ავალიანმა განაცხადა, დარბაზში ქართული დოკუმენტური ფილმების უფასო ჩვენებებები გაიმართება.

რეზო ჩხეიძის 90-ე დაბადების დღისადმი მიძღვნილ საღამოზე სტუმრებს ჩხეიძის შესახებ გადაღებული ფილმის ნახვის საშუალება უფასოდ მიეცათ. საიუბილეო დღის ფარგლებში ჩხეიძის ფოტოებისა და ფილმებში გამოყენებული ტანსაცმლის გამოფენაც გაიმართა.


„მეორე წელია რეზოს იუბილეს მის გარეშე ვხვდებით, ერთ-ერთ დარბაზს რეზოს სახელი მიენიჭა და სანამ კინოთეატრი იარსებებს, ქართული ფილმების უფასო ჩვენებები გაიმართება. ჩვენ ვაჩვენეთ ქუთაისში, რეზოზე გადაღებული ფილმი,“-განაცხადა ავალიანმა.


კინორეჟისორის საიუბილეო საღამოზე ქუთაისის მერი შოთა მურღულია იმყოფებოდა.

„უდიდესი კინორეჟისორის, რეზო ჩხეიძის იუბილეს აღვნიშნავთ .ყველა ამაყობს მისი ქართველობით. ჩვენ გვეამაყება, რომ ის ქუთაისელი იყო. კინოთეატრის ერთ-ერთი დარბაზი რეზო ჩხეიძის სახელობის გახდა. მომავალმა თაობებმა უნდა იცოდნენ, რომ ასეთი ბუმბერაზი გვყავდ,“-განაცხადა მურღულიამ.

ცნობისთვის, კინორეჟისორი რეზო ჩხეიძე ორი წლის წინ გარდაიცვალა.