'ღვინის გზა',- პატარების მიერ გაცოცხლებული იმერული შემოდგომის ტრადიცია თერჯოლაში

თერჯოლის მუნიციპალიტეტის გამგებელი თეიმურაზ ჯაფარიძე თერჯოლის 1-ლ საბავშვო ბაღში იმყოფებოდა, სადაც 5-6 წლიანთა ჯგუფის მიერ გამართულ ღონისძიებას დაესწრო. ზეიმს ასევე ესწრებოდნენ მუნიციპალიტეტის საკრებულოში ქალაქ თერჯოლის მაჟორიტარი დეპუტატი გიორგი ლილუაშვილი, საკრებულოს თავმჯდომარის მოადგილე სოფიო ბუსკივაძე, ა(ა)იპ „თერჯოლის სკოლამდელი აღზრდის მუნიციპალური ცენტრის“ დირექტორი მაია თორთლაძე და სხვა საპატიო სტუმრები.

საბავშვო ბაღის 5-6 წლიანთა ჯგუფის მიერ წარმოდგენილი იყო შემეცნებითი პროექტი „ღვინის გზა“. პატარები სტუმრებს ფიალებით ხელში ლამაზი ლექსებითა და სადღეგრძელოებით შეეგებნენ, მისალმების შემდეგ კი ეზოში საგანგებოდ ამ დღისათვის მოწყობილ სცენაზე გაიმართა კონცერტი, რომელიც საქართველოში ვაზისა და ღვინის განვითარების ისტორიასა და იმერული შემოდგომის ტრადიციებს მიეძღვნა.

იმერულ და ეროვნულ კოსტიუმებში გამოწყობილმა პატარებმა პატრიოტული და შემოდგომისადმი მიძღვნილი ლექსებით, სიმღერებითა და ქორეოგრაფიული ნომრებით მოხიბლეს დამსწრე საზოგადოება. დაარჩიეს სიმინდი, დაწურეს ყურძენი, მოადუღეს თათარა და ამოავლეს ჩურჩხელები. ყველა ბავშვმა იმხიარულა და სტუმრებსაც ძალიან მოეწონათ პატარების შემოქმედებითი აქტივობა.

NS